Ziara za kisiasa za Rais William Ruto katika eneo la Gusii zimeibua mvutano mpya wa kisiasa baada ya mgombeaji urais wa Jubilee, Fred Matiang’i, kurejea eneo hilo siku mbili tu baada ya ziara ya kiongozi huyo wa taifa, akisisitiza kuwa wakazi hawako tayari kubadilisha misimamo yao ya kisiasa kwa fedha na ahadi za maendeleo.

Matiang’i alisema jamii ya Abagusii imekomaa kisiasa na haiwezi kushawishiwa kuachana na upinzani kupitia zawadi za fedha au kile alichokitaja kuwa ahadi zisizotekelezwa na serikali.

Akizungumza Ijumaa, Novemba 13, 2026, wakati wa mazishi ya mjomba wake, Mzee John Mboga Nyaboga, yaliyofanyika Manga, eneo bunge la Borabu, Kaunti ya Nyamira, aliyekuwa Waziri wa Usalama wa Ndani alikosoa namna Rais Ruto alivyoendesha ziara yake ya siku nne katika eneo hilo.

Alidai kuwa Rais amegeuza siasa za Kenya kuwa mnada ambako viongozi wenye uwezo wa kifedha wanadhani wanaweza kununua uungwaji mkono wa wananchi.

“Mioyo, nafsi na dhamiri za watu wetu wa Gusii haziuzwi. Rais alikuwa hapa mapema wiki hii akigawa pesa, kama inavyoonekana katika video zinazosambaa mitandaoni. Watu wetu hawawezi kununuliwa,” alisema Matiang’i.

Alisisitiza kuwa wakazi wa Gusii wanahitaji maendeleo ya kweli na kuboreshwa kwa maisha yao badala ya viongozi kutumia fedha kuwashawishi kisiasa.

Matiang’i pia alikosoa matamshi ya Rais wakati wa ziara yake, akisema kampeni za kisiasa zinapaswa kuendeshwa kwa heshima badala ya matusi, vitisho na vitendo vya kuwashinikiza wapinzani.

Alidai kuwa serikali imekumbwa na changamoto za ufisadi na kushindwa kudhibiti hali ya usalama, akitaja ongezeko la visa vya wizi wa mifugo katika eneo la Gusii.

Aidha, alionya viongozi wanaodaiwa kutumia makundi ya wahuni kuwatisha wafuasi wa Jubilee na upinzani, akisema wakazi wa eneo hilo hawatakubali vitisho au vurugu.

Kauli zake zinaashiria kuongezeka kwa ushindani wa kisiasa kati ya kambi ya Rais Ruto na upinzani katika eneo la Gusii, ambalo limekuwa likilengwa na viongozi mbalimbali katika maandalizi ya uchaguzi mkuu wa 2027.

Rais Ruto alihitimisha ziara yake Jumatano, Novemba 11, akiwahimiza wakazi kumuunga mkono na kuchagua viongozi wanaounga mkono serikali jumuishi.

Matiang’i anatarajiwa kufanya mikutano ya kisiasa Kisii mjini na Keroka Jumapili, akiandamana na viongozi wengine wa upinzani akiwemo Martha Karua, Ndindi Nyoro na James Orengo.

Seneta wa Nyamira Okong’o Omogeni pia alimkosoa Rais, akidai wakulima wa chai katika eneo hilo wamekuwa wakipokea bonasi ndogo ikilinganishwa na wakulima wa maeneo hayo.