Familia moja katika eneo la Kaswanga, Kaunti ya Homa Bay, imekumbwa na majonzi baada ya mwanafunzi wa kidato cha kwanza kufariki dunia kufuatia kushambuliwa na kiboko alipokuwa akioga katika ufuo wa Ziwa Victoria.

Mwanafunzi huyo aliyetambuliwa kama Michael Ochieng Odhiambo, mwenye umri wa miaka 16, alikuwa mwanafunzi wa Shule ya Upili ya St. Pius Uriri katika Kaunti ya Migori.

Kwa mujibu wa taarifa za eneo hilo, Michael alikuwa ameandamana na baadhi ya marafiki zake watatu hadi ufukweni mwa Kaswanga jioni ya Jumatano, Novemba 18, 2026, kwa ajili ya kuoga kabla ya kushambuliwa na mnyama huyo wa porini.

Mkuu wa eneo la Rusinga Central, Wilson Odoyo, alisema kiboko huyo aliwashambulia ghafla watoto hao wakati wakioga, huku Michael akipigwa na mnyama huyo na kufariki papo hapo. Marafiki zake walifanikiwa kujiokoa bila kupata majeraha.

Odoyo alisema wanafunzi hao hawakuwa wameingia ndani sana ya ziwa wakati tukio hilo lilipotokea, akidokeza kuwa huenda kiboko huyo alikuwa amejificha karibu na ufuo na kusubiri muda mwafaka wa kuwashambulia.

Alieleza kuwa wavuvi waliokuwa karibu walijaribu kumwokoa Michael baada ya kushambuliwa, lakini juhudi zao hazikufua dafu kwani kiboko huyo alimkokota na kumzamisha ndani ya maji.

Kifo hicho kimeibua tena wasiwasi kuhusu usalama wa wakazi wanaoishi na kufanya shughuli zao katika fukwe za Ziwa Victoria, ambako kukutana na wanyama wakali kama viboko kunaweza kuhatarisha maisha ya watu.

Odoyo ametoa wito kwa wakazi, wavuvi na watu wanaotumia fukwe za ziwa hilo kuwa waangalifu zaidi, akionya kuwa ongezeko la wanyama wakali wanaozurura karibu na maeneo ya shughuli za binadamu linaweka maisha ya wananchi hatarini.

Amesisitiza umuhimu wa wakazi kuepuka kuingia majini au kukaa karibu na maeneo yanayojulikana kuwa na viboko, hasa nyakati za jioni na alfajiri, wakati wanyama hao wanaweza kuwa wakitafuta chakula au kurejea majini.

Kiboko ni miongoni mwa wanyama wakubwa na hatari zaidi barani Afrika. Licha ya kuonekana watulivu wanapokuwa majini, wanaweza kuwa wakali wanapohisi kutishiwa au wanapokutana na binadamu karibu na maeneo wanayoyamiliki.

Wataalamu wa wanyamapori wamekuwa wakisisitiza umuhimu wa watu kuepuka kukaribia viboko, kuwapa nafasi ya kutosha na kutowazuia wanapotaka kuingia au kutoka majini.

Tukio hilo linatoa onyo kwa wakazi wa maeneo yanayopakana na Ziwa Victoria kutanguliza usalama wanapotekeleza shughuli za kila siku, ikiwemo kuoga, kuvua samaki na kufua nguo, ili kuepusha vifo vinavyoweza kuzuilika.