Ole Lenku Azindua Chama, Wimbi La Vyama Lashika
Kuelekea uchaguzi mkuu wa mwaka 2027, wimbi la kuanzishwa kwa vyama vipya vya kisiasa nchini Kenya linazidi kushika kasi, huku viongozi wakitafuta majukwaa mapya ya kuwania uongozi na kuimarisha ushawishi wao wa kisiasa.
Miongoni mwa viongozi walioingia katika mkondo huo ni Gavana wa Kajiado Joseph Ole Lenku, ambaye amezindua rasmi chama kipya cha Forum for Economic Development Agenda (FEDA), akijitwika jukumu la kukiongoza katika safari yake ya kisiasa.
Chama hicho kilizinduliwa rasmi Novemba 6, 2026, katika hafla iliyofanyika Ufungamano House jijini Nairobi, huku uzinduzi mwingine ukiandaliwa katika kaunti za Kajiado, Narok na Marsabit.
Ole Lenku amesema FEDA kinalenga kutetea usawa, haki na maslahi ya jamii ambazo zimekuwa zikikabiliwa na ubaguzi na kutengwa katika maendeleo ya taifa.
Akizungumza wakati wa uzinduzi, gavana huyo alisisitiza kuwa chama hicho kina malengo ya kitaifa na hakitafungiwa katika eneo moja pekee, bali kitakuwa na ajenda inayolenga Wakenya kutoka sehemu mbalimbali za nchi.
Alieleza kuwa FEDA kinalenga kuendeleza maono ya viongozi waliopigania uhuru wa Kenya pamoja na wale wanaotaka taifa lenye maendeleo na fursa sawa kwa wananchi wote.
Uzinduzi huo unajiri wakati ambapo viongozi mbalimbali wanaanza kujipanga kisiasa, huku baadhi wakitafuta vyama vipya vya kuwania nafasi za uongozi na wengine wakijaribu kuimarisha ushawishi wao ndani ya vyama vilivyopo.
Kenya tayari ina zaidi ya vyama 100 vilivyosajiliwa kikamilifu, huku vingine vingi vikiendelea kutafuta usajili wa muda au kamili.
Kuongezeka kwa vyama hivyo kunahusishwa na juhudi za wanasiasa kujenga ushawishi wao, kupata nafasi katika mazungumzo ya miungano na kuhakikisha wanapata tiketi za kuwania nyadhifa mbalimbali.
Baadhi ya vyama vipya vinavyojitokeza ni People’s Prosperity Party cha aliyekuwa Waziri wa ICT Eliud Owalo, Freedom and Opportunity Party pamoja na Mwongozo Mpya Party.
Huku uchaguzi wa 2027 ukikaribia, kuanzishwa kwa FEDA kunaashiria namna ambavyo mazingira ya kisiasa yanavyoendelea kubadilika, huku viongozi wakijipanga mapema katika vita vya kuwania mamlaka na ushawishi wa kitaifa kwa ujumla.
