Mandera Yatikiswa! Watu 8 Wauawa Kwenye Shambulizi La Barabarani
Jumla ya watu nane wamefariki dunia kufuatia shambulizi la kuvizia lililolenga gari la usalama lililokuwa likiwasindikiza wafanyakazi wa ujenzi wa barabara katika eneo la Hagarsu, kwenye barabara ya Mandera-Arabia-Lafey, asubuhi ya leo.
Waliofariki ni wafanyakazi watano wa ujenzi wa barabara, maafisa wawili wa Kenya Police Reservists (KPR) pamoja na dereva wa gari hilo.
Gavana wa Mandera Mohamed Adan Khalif amethibitisha vifo hivyo, akielezea masikitiko yake kutokana na shambulizi hilo lililosababisha hasara kubwa ya maisha.
Katika taarifa yake, Khalif ametuma salamu za rambirambi kwa familia za waliofariki, marafiki na wafanyakazi wenzao, akisema kuwa mkasa huo ni pigo kubwa kwa wakazi wa Mandera na juhudi za kuendeleza miundombinu katika kaunti hiyo.
Shambulizi hilo limezua tena wasiwasi kuhusu hali ya usalama katika maeneo ya mpakani mwa kaunti ya Mandera, ambako matukio ya mashambulizi yameendelea kuwa chanzo cha hofu miongoni mwa wakazi.
Wananchi katika maeneo hayo wamekuwa wakiiomba serikali kuimarisha operesheni za kiusalama na kuongeza idadi ya maafisa wa usalama ili kuwalinda dhidi ya mashambulizi yanayohatarisha maisha yao.
Wakazi pia wamekuwa wakihitaji hatua madhubuti za kukabiliana na vitisho vya makundi yenye silaha, wakisema hali ya kutokuwa na uhakika wa usalama imekuwa ikiathiri shughuli za kawaida za maisha pamoja na utekelezaji wa miradi ya maendeleo.
Kisa cha hivi punde kinaibua maswali kuhusu usalama wa wafanyakazi wanaotekeleza miradi ya miundombinu katika maeneo hayo, hasa wale wanaolazimika kusafiri katika barabara zinazochukuliwa kuwa na changamoto za kiusalama.
Gavana Khalif amezitaka idara husika za usalama kuanzisha uchunguzi wa haraka kuhusu shambulizi hilo na kuhakikisha waliohusika wanakamatwa na kufikishwa mbele ya sheria.
Amesisitiza kuwa wakazi wa Mandera wanastahili kuishi katika mazingira ya amani na usalama, huku miradi ya maendeleo ikiendelea bila vitisho wala hofu.
Aidha, amesema serikali ya kaunti itaendelea kushirikiana na wadau mbalimbali katika juhudi za kurejesha amani na kuimarisha utulivu katika eneo hilo.
Ametoa pole kwa familia zilizoathirika na kuwaombea marehemu wote.
