Safari ya vijana wa Kenya chini ya umri wa miaka 17 katika michuano ya CECAFA nchini Rwanda imeacha simulizi tofauti nje ya uwanja, baada ya baadhi ya wachezaji walioiwakilisha nchi hiyo kulalamikia kutolipwa posho zao, wakidai wamekuwa wakipewa majibu kuwa fedha zao zilitumwa kwenye nambari zisizo sahihi za M-Pesa.

Wachezaji hao ambao walivaa jezi ya taifa katika mashindano hayo ya kikanda wanasema wamekuwa wakisubiri malipo yao bila mafanikio, huku wakielezwa kuwa fedha walizostahili kupokea zilipelekwa kwenye nambari za simu ambazo hazikuwa zao.

Hata hivyo, jambo hilo limezua mvutano baada ya baadhi ya wachezaji hao kupinga vikali madai kwamba wao ndio waliotoa taarifa zisizo sahihi za malipo.

Kwa mujibu wa wachezaji hao, wakati wa kujaza taarifa za malipo, kila mmoja aliwasilisha majina yake pamoja na nambari sahihi ya simu iliyosajiliwa kwa huduma ya M-Pesa.

Wanadai kuwa hawana maelezo ya namna taarifa hizo zilivyoweza kubadilika au kusababisha fedha zao kutumwa kwa watu wengine, huku wakitaka wahusika kutoa ufafanuzi wa kina kuhusu suala hilo.

Malalamiko hayo mapya yanaibuka wakati kukiwa na kumbukumbu za malalamiko kama hayo kutoka kwa wachezaji wengine waliowakilisha Kenya katika toleo la mwaka jana la michuano hiyo iliyofanyika nchini Ethiopia.

Baadhi ya wachezaji walioshiriki mashindano hayo ya mwaka uliopita pia walidai kutopokea posho zao, huku wakipewa maelezo kuwa fedha zilikuwa zimetumwa kwenye nambari zisizo sahihi za M-Pesa.

Hali hiyo sasa imeibua maswali kuhusu mfumo wa usimamizi na utoaji wa posho kwa wachezaji wanaopewa jukumu la kupeperusha bendera ya Kenya katika mashindano ya kimataifa.

Kwa vijana hao, suala la posho si tu kuhusu fedha wanazostahili kupata, bali pia ni heshima kwa juhudi, muda na kujitolea kwao wanapoiwakilisha nchi katika michuano ya kimataifa.

Wachezaji walioathirika sasa wanaitaka mamlaka husika kuingilia kati ili kuchunguza kilichotokea, kufuatilia malipo hayo na kuhakikisha kila mmoja anapokea fedha zake.

Aidha, wanataka kuwepo kwa uwazi zaidi katika mifumo ya malipo ili kuzuia matatizo kama hayo kujirudia katika mashindano yajayo.

Kwa sasa, macho yanaelekezwa kwa wahusika wa usimamizi wa timu hiyo kutoa majibu kuhusu madai hayo na kueleza ni lini vijana hao watapokea posho zao.

Ni hali inayozua mjadala kuhusu namna wanamichezo chipukizi wanavyoshughulikiwa baada ya kuitumikia nchi yao, huku wakisubiri haki yao nje ya uwanja kama walivyopambana kuitetea Kenya ndani ya uwanja.