Idara ya Upelelezi wa Makosa ya Jinai (DCI) imewakamata washukiwa watatu na kunasa kilogramu 454 za methamphetamine zenye thamani ya takriban Sh3.6 bilioni katika operesheni ya kijasusi iliyofanyika kaunti ya Kwale, ikiashiria pigo kubwa kwa mitandao ya kimataifa ya ulanguzi wa dawa za kulevya.
Operesheni hiyo iliyotekelezwa Novemba 7, 2026, katika kijiji cha Shirazi, Kwale, iliongozwa na maafisa wa National Anti-Narcotics Investigations Bureau (NANIB) kufuatia ushirikiano wa kijasusi kati ya Kenya na Tanzania.
Miongoni mwa waliokamatwa ni Basleman Saleh Khamis, anayedaiwa kuwa mfanyabiashara mkubwa wa dawa za kulevya na anayetafutwa na mamlaka za Kenya na Tanzania, pamoja na Nakabugo Zuraicah, raia wa Uganda mwenye umri wa miaka 37.
Uchunguzi zaidi uliwaelekeza maafisa katika kijiji cha Ganja la Simba, eneo la Kinondo, ambapo msako maalumu ulifanikisha kupatikana kwa kilogramu 454 za methamphetamine na kukamatwa kwa Hamad Seif Said, raia wa Tanzania mwenye umri wa miaka 54.
Magari mawili na pikipiki moja pia yalinaswa katika operesheni hiyo.
Akizungumza na wanahabari mjini Mombasa Jumatatu, Novemba 9, Mkurugenzi wa DCI Mohamed Amin alisema operesheni hiyo ni ushahidi wa mafanikio yanayopatikana kupitia upelelezi wa kijasusi na ushirikiano wa kikanda katika kupambana na biashara haramu ya dawa za kulevya.
Washukiwa hao watatu wamezuiliwa huku uchunguzi ukiendelea.
Amin alisema vita dhidi ya dawa za kulevya na pombe haramu vimepewa kipaumbele cha usalama wa taifa, hatua iliyochochea mageuzi ya kitengo cha zamani cha kupambana na dawa za kulevya kuwa NANIB.
Tangu Januari hadi Oktoba 2026, NANIB imenasa dawa za kulevya zikiwemo bangi, cocaine, heroin, methamphetamine na amphetamine zenye thamani ya Sh779.6 milioni na kuwakamata washukiwa 1,631.
Haya yanajiri miezi kadhaa baada ya Kenya kufanya operesheni kubwa zaidi ya kunasa methamphetamine, ambapo kilogramu 1,036 zilizonaswa kutoka kwa meli MV Mashaallah, zenye thamani ya Sh8.2 bilioni, ziliharibiwa Septemba 24 katika kiwanda cha Bamburi Cement mjini Mombasa.
DCI imesema itaendelea kushirikiana na mamlaka za kikanda na kimataifa kuvunja mitandao ya ulanguzi wa dawa za kulevya, huku ikiwataka wananchi kutoa taarifa zitakazosaidia kufichua washukiwa na wafadhili wa biashara hiyo haramu.
