Naibu Rais Kithure Kindiki amesema serikali ya Kenya inalenga kuhakikisha usawa katika ufadhili wa elimu ya juu kwa wanafunzi wote nchini, bila kujali hali ya kifedha ya familia zao au taasisi wanazosoma.
Kindiki amesema mfumo mpya wa ufadhili wa elimu ya juu unaopendekezwa na serikali unaendana na misingi ya utawala wa Rais William Ruto, ambao unalenga kuhakikisha kila Mkenya anapata fursa sawa za maendeleo na huduma za serikali.
Akizungumza katika kampasi ya Taveta ya Chuo cha Mafunzo ya Tiba cha Kenya (KMTC), eneo bunge la Taveta, Kaunti ya Taita Taveta, Kindiki alisema sheria inayowasilishwa bungeni kwa ajili ya kutungwa inalenga kuhakikisha serikali inafadhili kikamilifu wanafunzi wote wa Kenya katika taasisi za elimu ya juu.
Alisema mfumo huo mpya hautazingatia aina ya taasisi ambayo mwanafunzi anasomea wala uwezo wa kifedha wa familia yake, hatua ambayo alisema itaimarisha usawa katika upatikanaji wa elimu.
Naibu Rais alisisitiza kuwa serikali imejitolea kuhakikisha wanafunzi wote wanapata fursa ya kuendelea na masomo bila kukabiliwa na vikwazo vinavyotokana na tofauti za kiuchumi.
Kindiki alikuwa akizungumza baada ya kukagua shughuli za ujenzi wa mabweni ya wanafunzi katika kampasi hiyo, ambapo alitangaza kuwa serikali ya kitaifa inaendelea kujenga mabweni yatakayohudumia zaidi ya wanafunzi 180,000 katika taasisi mbalimbali za elimu ya juu nchini.
Alisema ujenzi huo unatekelezwa katika mwaka wa kwanza wa matumizi ya ushuru wa nyumba, unaojulikana kama Housing Levy, ambao serikali imeuelekeza katika miradi ya makazi na miundombinu ya kijamii.
Kwa mujibu wa Kindiki, usawa kwa wananchi wote na maeneo yote nchini ni msingi unaoongoza utawala wa Kenya Kwanza katika utekelezaji wa miradi na mipango yake.
Alisema serikali itaendelea kuhakikisha maendeleo yanafika katika maeneo mbalimbali ya nchi, huku ikipanua fursa kwa wananchi kupitia uwekezaji katika elimu, makazi na huduma nyingine muhimu.
Kauli ya Kindiki inajiri wakati mfumo wa ufadhili wa elimu ya juu ukiendelea kuwa suala muhimu kwa wanafunzi na familia zinazokabiliwa na gharama za elimu nchini na pia wale wanaotoka maeneo yenye ukame
