Huku msimu wa Siku Kuu ukikaribia na shughuli za usafiri zikitarajiwa kuongezeka katika barabara mbalimbali nchini, watu sita wamefariki dunia na wengine watano kujeruhiwa vibaya katika ajali ya lori iliyotokea eneo la Enengetia, kwenye barabara kuu ya Narok-Nakuru, Kaunti Ndogo ya Narok Kaskazini.
Ajali hiyo imeongeza wasiwasi kuhusu usalama wa barabarani wakati huu ambapo Wakenya wengi huanza kusafiri kuelekea maeneo mbalimbali kwa ajili ya shughuli za kifamilia na mapumziko ya sikukuu.
Kwa mujibu wa Kamanda wa Polisi wa Kaunti ya Narok, Patrick Lobolia, ajali hiyo ilihusisha lori lililokuwa likisafiri kutoka Nakuru kuelekea Narok.
Lobolia alisema dereva wa lori hilo, mwenye umri wa miaka 35, alipoteza udhibiti wa gari alipofika eneo la Enengetia, kabla ya lori kutoka nje ya barabara na kugonga chuma kilichokuwa upande wa kushoto wa barabara hiyo.
Kutokana na athari za ajali hiyo, dereva pamoja na abiria watano ambao hawakuwa wametambuliwa kufikia wakati wa kutolewa kwa taarifa hiyo walifariki dunia papo hapo.
Abiria wengine watano pia walipata majeraha mabaya na kuhitaji kupelekwa hospitalini kwa matibabu ya haraka.
Miili ya waliofariki ilipelekwa katika Hospitali ya Egerton, Kaunti ya Nakuru, ambako inatarajiwa kufanyiwa uchunguzi wa maiti huku juhudi za kuwatambua marehemu zikiendelea.
Majeruhi walikimbizwa katika Kituo cha Afya cha Mau Narok kwa matibabu.
Ajali hiyo inajiri wakati ambapo matukio ya vifo barabarani yameendelea kuibua hofu nchini, huku mamlaka zikisisitiza umuhimu wa madereva kuzingatia sheria za trafiki na kuwa waangalifu wanapokuwa barabarani.
Mnamo Oktoba 3, watu 17 walifariki katika ajali ya magari mengi eneo la Salama, barabara kuu ya Nairobi-Mombasa, ambapo lori lilisababisha msururu wa migongano iliyohusisha matatu na magari mengine.
Tarehe 25 Oktoba, watu 22 walifariki baada ya basi kugongana ana kwa ana na lori eneo la Kanga, karibu na Mtito Andei, katika ajali iliyohusisha wasafiri waliokuwa wakirejea kutoka mazishi.
Matukio hayo yanaendelea kuibua wito wa kuimarishwa kwa hatua za usalama barabarani, hasa wakati ambapo idadi ya magari na wasafiri huongezeka kutokana na shughuli za sikukuu.
Mamlaka za usalama zimekuwa zikisisitiza umuhimu wa madereva kuzingatia mwendo unaofaa, kuepuka kuendesha magari wakiwa wamechoka, pamoja na kuhakikisha magari yako katika hali nzuri kabla ya safari.
Huku familia zikijiandaa kwa sherehe za mwisho wa mwaka, ajali hizi zinatoa ukumbusho mzito kwamba safari salama inaanza na uwajibikaji wa kila mtumiaji wa barabara.
