Huku mwanaharakati wa Tanzania Twaha Mwaipaya akiwa bado hajulikani alipo baada ya kutoweka katika eneo la Kamulu, Nairobi, shirika la kutetea haki za binadamu la Vocal Africa limewasilisha ombi la dharura katika Mahakama Kuu likitaka vyombo vya usalama vimfikishe mahakamani na kueleza aliko.
Katika ombi hilo, shirika hilo linaitaka mahakama kutoa amri kwa maafisa wa usalama kumfikisha Mwaipaya mbele ya Mahakama Kuu au Mahakama ya Jinai ya Milimani ndani ya saa 24, pamoja na hati yoyote ya kisheria inayoidhinisha kuzuiliwa kwake.
Mwaipaya anaripotiwa kutekwa nyara Jumapili, Oktoba 25, katika kituo cha magari cha Kanisani, Kamulu, kando ya barabara kuu ya Nairobi-Mombasa na wanaume waliokuwa wamejihami na kusafiri kwa gari aina ya pickup nyeusi yenye sehemu mbili za abiria.
Kulingana na nyaraka za mahakama, washukiwa hao walikuwa wamevaa vifunika nyuso na miwani myeusi wakati wa tukio hilo lililoripotiwa kutokea mwendo wa saa saba mchana.
Ombi hilo linaungwa mkono na hati ya kiapo iliyowasilishwa na wakili wa kutetea haki za binadamu Hussein Khalid, ikieleza kuwa rafiki aliyekuwa pamoja na Mwaipaya alifanikiwa kutoroka na kushuhudia tukio hilo.
Nyaraka hizo zinamnukuu rafiki huyo akionya watu kuwa wakiona gari jeusi la pickup likiwafuatilia, wanapaswa kukimbia ili kujinusuru.
Vocal Africa imesema mahali alipo Mwaipaya na hali yake ya kiafya bado havijulikani, licha ya ripoti ya kutoweka kwake kuwasilishwa katika Kituo cha Polisi cha Ruai chini ya nambari ya OB 47/25/10/2026.
Shirika hilo linasema familia yake na mawakili wake hawajafahamishwa aliko, sababu za kukamatwa kwake au chombo cha usalama kinachodaiwa kumshikilia.
Katika ombi hilo, shirika linataka Inspekta Jenerali wa Polisi Douglas Kanja Kirocho na Mkurugenzi Mkuu wa Huduma ya Kitaifa ya Ujasusi (NIS), Noordin Mohamed Haji, waitwe mahakamani kueleza wanachojua kuhusu kutoweka kwa mwanaharakati huyo.
Aidha, waombaji wanataka mahakama itoe amri za muda za kuzuia kukamatwa au kuzuiliwa kwa Mwaipaya kwa tuhuma zozote za jinai bila idhini au amri ya mahakama, wakati ombi hilo likisubiri kusikilizwa na kuamuliwa.
Vocal Africa pia inataka Mwaipaya aachiliwe bila masharti iwapo atafikishwa mahakamani, hadi pale mashtaka yoyote yatakapowasilishwa dhidi yake mbele ya mahakama yenye mamlaka.
Shirika hilo limeitaka mahakama kuagiza mamlaka husika kuhifadhi na kuwasilisha rekodi za kamera za CCTV, mifumo ya kutambua nambari za magari, rekodi za vituo vya ushuru barabarani, data za mitandao ya simu na taarifa za ufuatiliaji wa magari katika eneo la Kamulu kuanzia Oktoba 25.
Rekodi hizo zinatarajiwa kusaidia kubaini mazingira yaliyopelekea kutoweka kwake na kuwafichua waliohusika.
Waombaji pia wanataka uchunguzi huru, wa haraka na wa kina kufanywa kuhusu tukio hilo, huku ripoti kamili za uchunguzi zikiwasilishwa mahakamani ndani ya siku 14.
Katika kuimarisha hoja zao, waombaji wametaja visa vya kutoweka kwa Macmillan Kiarie, Evans Otieno, Michael Oloo na Abdulaziz Duba, wakidai kuwa kuna mfanano katika mazingira ya visa hivyo.
Mwaipaya anatajwa kuwa raia wa Tanzania na mkosoaji wa serikali ya nchi hiyo mwenye wafuasi wengi kwenye mitandao ya kijamii.
Vocal Africa ina hofu kuwa huenda akahamishwa kwa nguvu hadi Tanzania, ambako inadai anaweza kukabiliwa na mateso, kuzuiliwa bila mawasiliano na familia au mawakili wake, pamoja na ukiukaji mwingine wa haki za binadamu.
Shirika hilo pia limetaja kutekwa kwa mwanasiasa wa upinzani nchini Uganda, Dkt. Kizza Besigye, mwaka 2024, kama sehemu ya sababu za wasiwasi wake kuhusu uwezekano wa watu kuhamishwa kuvuka mipaka kwa njia zisizo halali.
Kwa msingi huo, waombaji wanasisitiza kuwa uingiliaji wa haraka wa mahakama ni muhimu kulinda haki za kikatiba za Mwaipaya, zikiwemo haki ya uhuru na ulinzi dhidi ya mateso na vitendo vingine vya kikatili, visivyo vya kibinadamu au vinavyodhalilisha utu.
Vocal Africa inataka ombi hilo kutangazwa kuwa la dharura na kusikilizwa awali bila kuwapa wajibu walengwa nafasi ya kujibu, huku suala la kuwapa notisi ya ombi hilo likiahirishwa katika hatua hiyo ya kwanza.
