Shirika la Umoja wa Mataifa la Kuratibu Masuala ya Kibinadamu (OCHA) limesema kuwa Umoja wa Mataifa na washirika wake wanaendelea kuingiza misaada ya kibinadamu katika Ukanda wa Gaza na kuifikisha kwa watu wanaohitaji, licha ya vikwazo vya usafirishaji na uhaba wa fedha.
Hata hivyo, shughuli za usafirishaji wa misaada zimesimamishwa kwa muda leo kufuatia kufungwa kwa kivuko cha Kerem Shalom na Israel kutokana na shughuli za uchaguzi.
Kwa mujibu wa OCHA, timu za Umoja wa Mataifa ziliingiza bidhaa mbalimbali za msaada Gaza jana, zikiwemo vyakula, blanketi, mavazi ya kujikinga na baridi, vifaa vya shule pamoja na mafuta ya kuendeshea shughuli muhimu.
Misaada hiyo inalenga kukidhi mahitaji ya msingi ya maelfu ya watu wanaoishi katika mazingira magumu, huku wakijiandaa kukabiliana na msimu mwingine wa baridi kali.
Katika kipindi cha wiki iliyopita, washirika wa kibinadamu walisambaza mabegi ya shule kwa zaidi ya watoto 8,000, sambamba na vifaa vingine vya elimu ili kuwawezesha kuendelea na masomo licha ya changamoto zinazowakabili.
Wiki iliyotangulia, takribani wavulana na wasichana 22,000 walipokea vifaa vya kuandikia, huku madarasa 300 yakipatiwa vifaa muhimu kwa ajili ya kusaidia elimu ya watoto wapatao 60,000.
Hata hivyo, hali ya makazi bado ni ya kutia wasiwasi, huku wakazi wengi wa Gaza wakijiandaa kukabiliana na msimu wa nne wa baridi tangu kuanza kwa hali ya dharura inayowakabili.
Maelfu ya familia zinaendelea kuishi katika mahema yaliyochakaa na makazi ya muda yasiyotoa ulinzi wa kutosha dhidi ya baridi, upepo mkali na mvua. Hali hiyo inazidisha hofu ya mafuriko ambayo yanaweza kusababisha watu wengi zaidi kuyahama makazi yao.
Shirika la Umoja wa Mataifa la Maendeleo (UNDP) lilisema katika ujumbe lililochapisha kwenye mitandao ya kijamii wiki hii kuwa timu zake zinatumia mabaki ya saruji yaliyosagwa na kurejelewa kuinua na kusawazisha maeneo ya makazi ya muda kabla ya kuanza kwa msimu wa mvua.
Hatua hiyo inalenga kupunguza hatari ya mahema na makazi ya muda kuathiriwa na maji ya mvua, ingawa mahitaji bado ni makubwa kuliko uwezo wa misaada iliyopo.
Tathmini iliyofanywa na washirika wa kibinadamu wanaoshughulikia makazi ilibaini kuwa takribani watu 950,000 wanaishi katika maeneo ya wakimbizi wa ndani yaliyo katika hatari ya wastani hadi kubwa ya kukumbwa na mafuriko.
Mvua kubwa inaweza kulazimisha wakazi wa maeneo hayo kuhama tena, huku akiba ya vifaa vya kuwasaidia walioathiriwa ikiwa haitoshi kukidhi mahitaji yanayotarajiwa.
Kutokana na hali hiyo, mashirika ya kibinadamu yanatoa wito wa kutolewa kwa fedha zaidi na kuondolewa au kulegezwa kwa vikwazo vinavyozuia uingizaji wa misaada.
Rufaa ya dharura ya dola bilioni nne za Marekani iliyotolewa kusaidia watu katika maeneo ya Palestina yanayokaliwa, ikijumuisha Gaza na Ukingo wa Magharibi, imepata asilimia 41 pekee ya fedha zinazohitajika.
Upungufu huo wa fedha unazidisha changamoto za mashirika yanayojaribu kutoa chakula, vifaa vya makazi, huduma za elimu na mahitaji mengine ya msingi.
Mashirika hayo yanasema kuwa kuongezwa kwa ufadhili na kuruhusiwa kwa misaada kuingia bila vikwazo visivyo vya lazima ni muhimu ili kuzuia hali ya kibinadamu kuzorota zaidi wakati wa msimu wa baridi.
