Aliyekuwa kocha wa Manchester United, Erik ten Hag, ameonya kuwa klabu hiyo inaweza kushuka daraja kutoka Ligi Kuu England (Premier League) iwapo itaendelea kukumbwa na mfululizo wa matokeo mabaya, akisisitiza kuwa ushindani mkubwa wa ligi hiyo hauipi timu yoyote nafasi ya kujihakikishia usalama.
Ten Hag amesema hali ya ushindani katika Premier League imefikia kiwango ambacho hata klabu kubwa zinaweza kujikuta katika mazingira magumu zinaposhindwa kupata matokeo mazuri katika mechi kadhaa mfululizo.
Akizungumza na ESPN NL, kocha huyo wa zamani wa United amesema kuwa tofauti za uwezo kati ya timu zinazoshiriki ligi hiyo zimepungua, huku kila klabu ikiwa na kikosi chenye ushindani pamoja na benchi la ufundi lenye makocha wenye uwezo.
“Katika Premier League, hilo linawezekana kwa sababu timu zote zina nguvu. Zina vikosi imara na makocha wazuri. Ukianza kupata matokeo mabaya na kuingia kwenye mzunguko huo, hali inaweza kuwa ngumu sana,” alisema Ten Hag.
Kauli yake imeibua mjadala kuhusu mwenendo wa Manchester United, ambayo imekuwa ikikabiliwa na changamoto ya kurejesha makali yake katika soka la England baada ya kupitia misimu kadhaa yenye matokeo yasiyoridhisha.
Katika kipindi husika, United ilikuwa imeshuka hadi nafasi ya 17 kwenye msimamo wa Premier League baada ya kupoteza dhidi ya Chelsea, hali iliyoongeza wasiwasi miongoni mwa mashabiki kuhusu uwezekano wa timu hiyo kuendelea kubaki katika ligi hiyo.
United, ambayo ni miongoni mwa klabu zenye historia kubwa ya mafanikio nchini England, imekuwa ikitarajiwa kupigania nafasi za juu badala ya kujikuta katika vita vya kuwania kubaki kwenye ligi.
Ten Hag, ambaye aliwahi kuinoa klabu hiyo baada ya kujiunga nayo mwaka 2022, anaifahamu vyema presha inayotokana na matarajio makubwa ya mashabiki na uongozi wa klabu hiyo.
Katika kipindi chake Old Trafford, alifanikiwa kuiongoza United kutwaa Kombe la Carabao mwaka 2023 na Kombe la FA mwaka 2024, kabla ya kuondoka kwake Oktoba mwaka huohuo.
Kauli yake inaonesha ukubwa wa ushindani uliopo Premier League, ambako historia na ukubwa wa jina la klabu haviwezi kuwa kinga dhidi ya kushuka daraja.
Kwa Manchester United, changamoto kubwa inabaki kuwa kurejesha uthabiti wa matokeo na kuhakikisha haiendelei kupoteza pointi muhimu katika mechi zinazofuata.
