Mwanariadha Mkenya Sheila Chepkirui ameendeleza ubabe wa Kenya katika riadha ya kimataifa baada ya kutwaa ubingwa wa mbio za wanawake katika mashindano ya New York City Marathon ya mwaka 2026 yaliyofanyika Jumapili, Novemba 1, nchini Marekani.
Chepkirui alivuka mstari wa mwisho jijini New York kwa muda wa saa 2, dakika 24 na sekunde 36, na hivyo kujinyakulia taji lake la pili katika mashindano hayo baada ya ushindi wake wa mwaka 2024.
Mkenya huyo alilazimika kupambana vikali na washindani wake, hasa Mkenya mwenzake Hellen Obiri, ambaye alikuwa akitetea ubingwa alioutwaa mwaka 2025.
Obiri, aliyekuwa akilenga kutwaa taji hilo kwa mara ya tatu, alimaliza katika nafasi ya tatu kwa muda wa saa 2, dakika 24 na sekunde 43.
Mwanariadha wa Marekani Jessica McClain alijipatia nafasi ya pili baada ya kutumia saa 2, dakika 24 na sekunde 42, akimzidi Obiri kwa tofauti ya sekunde moja pekee.
Katika hatua za mwisho za mashindano hayo, Chepkirui aliweza kuongeza kasi na kujitenga na washindani wake, akionyesha uimara na ustahimilivu uliomwezesha kurejea kileleni mwa mashindano hayo.
Mkenya mwingine, Edna Kiplagat, alimaliza katika nafasi ya nne kwa muda wa saa 2, dakika 25 na sekunde 42, huku Mercy Chelangat akishika nafasi ya tano kwa saa 2, dakika 25 na sekunde 46.
Ushindi huo unaimarisha nafasi ya Chepkirui miongoni mwa wanariadha wa Kenya wanaotamba katika mashindano makubwa ya kimataifa, huku akithibitisha uwezo wake katika mbio za masafa marefu.
Katika mbio za wanaume, Mswidi Andreas Almgren alitwaa ubingwa kwa muda wa saa 2, dakika 6 na sekunde moja, katika mbio zake za kwanza za marathon.
Mkenya Benson Kipruto, ambaye alikuwa akitetea taji lake, alimaliza katika nafasi ya nne kwa muda wa saa 2, dakika 6 na sekunde 27.
Mashindano ya mwaka huu yalivutia maelfu ya wanariadha kutoka mataifa mbalimbali duniani, huku yakipitia maeneo matano makuu ya Jiji la New York na kuendeleza hadhi yake kama moja ya mashindano makubwa zaidi ya marathon duniani.
