Aliyekuwa Katibu Mkuu wa chama cha United Democratic Alliance (UDA), Cleophas Malala, amevunja ukimya kuhusu madai ya kuwepo kwa ushindani wa kisiasa kati yake na Seneta wa Nyandarua John Methu, akisisitiza kuwa hahisi kutishwa na mwanasiasa huyo wala kubaguliwa na aliyekuwa Naibu Rais Rigathi Gachagua.
Malala amesema hana sababu ya kuhofia ushawishi wa Methu katika siasa za Mlima Kenya, akipuuza madai kwamba wawili hao wamekuwa wakishindania nafasi na ushawishi ndani ya mrengo wa kisiasa unaoongozwa na Gachagua.
Kauli hiyo inajiri wakati ambapo mijadala kuhusu nafasi ya viongozi mbalimbali ndani ya kambi ya Gachagua ikiendelea kushika kasi, huku washirika wake wakijipanga kuimarisha ushirikiano wa kisiasa kuelekea Uchaguzi Mkuu wa mwaka 2027.
Malala pia amekanusha madai kwamba amesukumwa pembeni na Gachagua katika mipango ya kisiasa ya mrengo huo, akisisitiza kuwa hajahisi kutengwa licha ya tetesi zinazodai kuwa baadhi ya viongozi wamepewa nafasi kubwa zaidi katika mikakati inayoendelea.
Amesisitiza kuwa tofauti za kisiasa au ushindani wa ushawishi hazimaanishi kuwa viongozi hawawezi kushirikiana katika kutekeleza malengo yao ya pamoja.
Seneta John Methu amekuwa miongoni mwa viongozi wanaohusishwa na mijadala ya kisiasa katika eneo la Mlima Kenya, ambako mipango ya kujenga ushawishi kuelekea uchaguzi wa 2027 imeendelea kuvutia hisia.
Kwa upande wake, Gachagua amekuwa akijikita katika juhudi za kuunganisha viongozi wa upinzani na kujenga muungano mpana wa kisiasa unaolenga kutoa changamoto kwa utawala wa Rais William Ruto.
Hata hivyo, nafasi na ushawishi wa viongozi mbalimbali ndani ya muungano huo vimeendelea kuwa mada ya mjadala, huku wadadisi wa siasa wakifuatilia namna makundi tofauti yatakavyosawazisha maslahi yao na kuafikiana kuhusu uongozi.
Kauli ya Malala inaweka wazi msimamo wake kuhusu madai ya kutengwa na ushindani wa kisiasa, huku akionyesha kuwa hana hofu kuhusu nafasi yake ndani ya kambi hiyo.
Huku uchaguzi wa 2027 ukizidi kukaribia, namna viongozi hao watakavyosimamia tofauti zao na kudumisha ushirikiano itakuwa sehemu muhimu ya safari ya kisiasa ya mrengo wa upinzani.
Hataa hivyo hii no ishara ya mwanzo wa kampeni.
