McCarthy Aweka Wazi Silaha za Harambee Stars vs Bafana

Kocha mkuu wa Harambee Stars, Benni McCarthy, ametangaza kikosi cha mwisho cha wachezaji 24 kitakachoiwakilisha Kenya katika mechi mbili za kufuzu kwa Kombe la Mataifa ya Afrika (AFCON) 2027 dhidi ya Bafana Bafana ya Afrika Kusini.

Kikosi hicho kina mchanganyiko wa wachezaji wanaocheza ndani na nje ya nchi, huku nahodha Michael Olunga na beki Eric Marcelo Ouma wakirejea baada ya kukosa mechi za hivi karibuni kutokana na majeraha.

McCarthy amewajumuisha pia kiungo Alwyn Tera, anayerejea katika kikosi cha taifa baada ya takribani miaka minne, pamoja na mshambuliaji Job Ochieng wa Real Sociedad nchini Uhispania.

Kikosi hicho kinajumuisha makipa Byrne Omondi wa Gor Mahia, Brian Bwire wa Tusker na Faruk Shikhalo wa Nairobi United.

Katika safu ya ulinzi, McCarthy amewateua Abud Omar wa Tusker, Frank Odhiambo na Sylvester Owino wa Gor Mahia, Amos Wanjala wa Valencia, Eric Marcelo Ouma wa Raków Częstochowa, Stanley Wilson wa AIK, Vincent Harper wa Exeter City, Ronney Onyango wa Sogndal na Hannif Wesonga wa Jamus FC.

Safu ya kiungo inajumuisha Manzur Okwaro wa Stade de Reims, Alwyn Tera wa Ararat-Armenia, Henry Ochieng wa Slough Town na Zak Vyner wa Wrexham.

Katika safu ya ushambuliaji, Olunga ataungana na Job Ochieng, Mohammed Bajaber wa Nairobi United, Will Lenkupae wa Tulsa, Adam Wilson wa The New Saints, Ben Stanley wa Gor Mahia, Ryan Ogam wa RFC Liège na Micah Obiero wa Carlisle United.

Harambee Stars itakutana na Bafana Bafana katika mechi ya kwanza Ijumaa, Novemba 13, katika Uwanja wa Orlando, Soweto, Afrika Kusini, kabla ya kuwakaribisha wapinzani hao katika mechi ya marudiano Jumanne, Novemba 17, katika Uwanja wa Nyayo, Nairobi.

Mechi zote mbili zitaanza saa moja usiku kwa saa za Kenya.

Ingawa Kenya tayari imefuzu kwa AFCON 2027 kama mwenyeji mwenza pamoja na Uganda na Tanzania, mechi hizo ni muhimu kwa McCarthy katika kuimarisha kikosi chake kuelekea mashindano hayo.

Harambee Stars itakuwa ikitafuta ushindi wake wa kwanza katika kampeni ya kufuzu baada ya kutoka sare ya bao 1-1 dhidi ya Eritrea na kupoteza 1-0 dhidi ya Guinea.