Mbunge wa Gilgil, Martha Wangari, ameondoka katika chama tawala cha United Democratic Alliance (UDA) kinachoongozwa na Rais William Ruto na kujiunga na chama cha Democracy for the Citizens Party (DCP) kinachoongozwa na aliyekuwa Naibu Rais Rigathi Gachagua.
Wangari amepokelewa rasmi na Gachagua katika makazi yake ya Wamunyoro, Kaunti ya Nyeri, Ijumaa, Novemba 20, 2026, huku misimamo na miungano mipya ya kisiasa ikiendelea kujitokeza nchini Kenya kuelekea Uchaguzi Mkuu wa mwaka 2027.
Akieleza sababu za kuhamia DCP, mbunge huyo amesema amekuwa akifanya mikutano na wananchi wa eneo lake la Gilgil ili kusikiliza maoni yao kuhusu mwelekeo wake wa kisiasa na kugundua kuwa wengi wanataka ajiunge na chama hicho.
Wangari, ambaye alichaguliwa kwa mara ya pili kupitia tiketi ya UDA katika Uchaguzi Mkuu wa mwaka 2022, anatarajia kuwania muhula wa tatu katika uchaguzi ujao.
Amesema uamuzi wake umechangiwa na matakwa ya wapiga kura wake, ambao kwa mujibu wake wamemtaka kutumia DCP kama jukwaa lake la kisiasa kuelekea uchaguzi huo.
"Nimekuwa nikizunguka eneo langu la uwakilishi nikisikiliza wananchi wangu, na ni wazi kwamba wanataka nijiunge na DCP," amesema Wangari.
Kwa upande wake, Gachagua amesema kuhamia kwa Wangari ni mwanzo wa wimbi la wanasiasa wengine kujiunga na chama hicho, akieleza kuwa milango iko wazi kwa viongozi wanaotaka kuwa sehemu ya DCP.
Ameelezea hatua hiyo kama sehemu ya kile alichokiita kipindi cha mabadiliko ya kisiasa, akiwakaribisha viongozi kutoka vyama vingine kujiunga na chama chake.
"Ni wakati wa dirisha la uhamisho wa kisiasa, na kila kiongozi anakaribishwa mahali anapohisi anafaa. DCP ndicho chama cha mustakabali wa baadaye," amesema Gachagua.
Gachagua pia amemhakikishia Wangari kuwa chama hicho kitaendesha mchakato wa uteuzi wa wagombea kwa njia huru na ya haki kabla ya Uchaguzi Mkuu wa 2027.
Amesema mchujo wa wagombea wa chama hicho umepangwa kufanyika Machi 2027 na kumhimiza mbunge huyo kuimarisha uungwaji mkono wake katika ngazi ya mashinani kabla ya zoezi hilo.
Wangari anakuwa miongoni mwa wabunge kadhaa walioondoka UDA na kujiunga na DCP katika kipindi cha hivi karibuni.
Wengine ni Mbunge wa Naivasha Jayne Kihara, Mbunge wa Kipipiri Wanjiku Muhia, Mbunge wa Gatundu Kusini Gabriel Kagombe, Mbunge wa Laikipia Magharibi Wachira Karani pamoja na Mwakilishi wa Wanawake wa Nyeri Rahab Mukami.
Mabadiliko hayo yanajiri wakati wanasiasa nchini Kenya wakianza kupanga mikakati na kujipanga upya kisiasa kuelekea uchaguzi wa mwaka 2027.









