Mwigizaji wa Kenya Regina Re na wanafamilia wawili wameendelea kuzuiliwa na polisi huku uchunguzi kuhusu mauaji ya mama yake mwenye umri wa miaka 86 ukiingia katika hatua nyingine, baada ya upande wa mashtaka kuiomba mahakama kuongeza muda wa kuwashikilia washukiwa hao kwa siku 10 zaidi.
Ombi hilo linahusiana na mauaji ya Dorita Lasinder Macharia, ambaye mwili wake ulipatikana ukiwa na majeraha ya visu nyumbani kwake katika eneo la Loresho, Nairobi, Oktoba 30, 2026.
Regina, ambaye jina lake halisi ni Regina Wambui Macharia Gitao, anachunguzwa pamoja na ndugu yake Alton Jimmy Macharia na mpwa wake Thandie Malaika Wanjiku Gitao.
Washukiwa hao pamoja na Immanuel Munyeki walifikishwa mahakamani Novemba 2, ambapo Hakimu Barbara Akinyi wa Mahakama ya Kibera aliruhusu polisi kuwazuilia kwa siku 10 katika Kituo cha Polisi cha Gigiri ili kukamilisha uchunguzi.
Katika maombi yake ya awali, upande wa mashtaka uliomba siku 15, lakini mahakama ikaruhusu siku 10 pekee.
Wakili wa utetezi David Oyatta alipinga ombi la polisi la kuongeza muda huo, akisema baadhi ya washukiwa walikuwa tayari wameshirikiana na wachunguzi kwa kurekodi taarifa zao na kukabidhi simu zao.
Oyatta pia alieleza mahakama kuwa Thandie ni mwanafunzi anayetarajia kufanya mitihani yake, hivyo kuzuiliwa kwake kwa muda mrefu kunaweza kuathiri masomo yake.
Katika ushahidi uliowasilishwa mahakamani, afisa wa polisi David Njoroge alisema uchunguzi wa awali ulionyesha kuwa Dorita alikuwa ameingia katika mzozo na mjukuu wake Thandie baada ya madai ya kumkuta akiwa katika hali isiyofaa na mpenzi wake ndani ya nyumba.
Inadaiwa Dorita alimwamuru Thandie kuondoka nyumbani na kurejesha funguo, huku akiwaagiza pia marafiki waliokuwa wamemtembelea kuondoka.
Baadaye, Dorita alimpigia simu mwanawe Jimmy kumsaidia kumwondoa Thandie nyumbani. Mjukuu huyo aliondoka lakini akarudi baadaye na kukaa na nyanya yake kwa takriban saa moja kabla ya kupiga mayowe akiomba msaada baada ya kumkuta akivuja damu nyingi.
Uchunguzi wa maiti uliofanywa Novemba 3 na daktari wa serikali Bernard Midia ulionyesha kuwa Dorita alifariki kutokana na kupoteza damu nyingi kufuatia majeraha mawili ya kina shingoni yaliyoharibu mishipa muhimu ya damu.
Wachunguzi pia walikuwa wakifuatilia picha za CCTV, mawasiliano ya simu, alama za vidole na taarifa za mashahidi ili kubaini mazingira ya mauaji hayo.
Katika maendeleo ya Novemba 12, mahakama iliruhusu polisi kuwazuilia Regina na washukiwa wengine wawili kwa siku mbili zaidi badala ya siku 10 zilizoombwa.
Immanuel Munyeki aliachiliwa baada ya upande wa mashtaka kuelekeza aachiliwe kutokana na kukosekana kwa ushahidi wa kumhusisha na mauaji hayo.
Regina alijipatia umaarufu kupitia kipindi cha televisheni cha *Who's Smarter Now?* kilichoonyeshwa kati ya mwaka 1999 na 2006.
