Watu wanne wamejeruhiwa baada ya jengo kuporomoka jijini Nairobi.
Jengo hilo,eneo la Moi Avenue ambalo awali lilibeba chumba cha burudani cha Cub Avedia, limeporomoka wakati wa shughuli za ubomoaji.
Tukio hilo lilitokea Ijumaa usiku, Oktoba 16, 2026, na kuhamaisha wito wa kufanyika kwa uchunguzi kubaini chanzo cha kuporomoka kwa jengo hilo na iwapo shughuli za ubomoaji zilitekelezwa kwa kuzingatia kanuni za usalama.
Afisa Mkuu wa Kaunti ya Nairobi anayesimamia Masuala ya Ushirikishwaji wa Wananchi na Huduma kwa Wateja, Geoffrey Mosiria, amesema tukio hilo lilitokea usiku wakati idadi ya watu waliokuwa wakipita katika barabara hiyo ilikuwa ndogo, hali ambayo huenda ilisaidia kuzuia maafa zaidi.
Katika taarifa yake baada ya tukio hilo, Mosiria alisema ni afueni kwamba jengo hilo liliporomoka usiku, akibainisha kuwa madhara yangekuwa makubwa zaidi iwapo tukio hilo lingetokea mchana wakati eneo hilo huwa na msongamano wa watembea kwa miguu na magari.
“Tunamshukuru Mungu kwamba tukio hilo lilitokea usiku wakati watu waliokuwa wakipita barabarani walikuwa wachache, kwani huenda maisha yangepotea,” alisema Mosiria.
Watu hao wanne waliripotiwa kupelekwa hospitalini kwa matibabu. Taarifa za awali zilionyesha kuwa watatu walikuwa katika hali tulivu, huku mmoja akiwa katika hali mahututi.
Hata hivyo, maelezo zaidi kuhusu utambulisho wa waliojeruhiwa na mazingira yaliyosababisha majeraha yao hayakuwa yamepatikana mara moja.
Mosiria amewataka wahandisi wa kaunti kufanya uchunguzi wa kina ili kubaini kilichosababisha jengo hilo kuporomoka wakati wa ubomoaji.
Amesema uchunguzi huo unapaswa kubaini iwapo wataalamu waliohitimu walihusika kusimamia shughuli hizo, pamoja na kuthibitisha iwapo vibali vyote vinavyohitajika kwa ubomoaji vilipatikana kabla ya kazi kuanza.
Aidha, afisa huyo amewataka wawekezaji na wakandarasi wanaojihusisha na miradi ya ujenzi na ubomoaji kuzingatia kikamilifu sheria za kaunti na masharti ya usalama.
Amesisitiza umuhimu wa kushirikiana na wahandisi wa kaunti ili kuhakikisha shughuli za ubomoaji zinasimamiwa ipasavyo na hatua zinazofaa za usalama kuchukuliwa kuwalinda wafanyakazi, watembea kwa miguu na wananchi wengine.
“Ninawataka wahandisi wetu wa kaunti kufanya uchunguzi wa kina kuhusu ubomoaji huu ili kubaini chanzo cha jengo kuporomoka, kufahamu iwapo wataalamu waliohitimu walihusika kutoa mwongozo wa ubomoaji na kuthibitisha kama vibali vyote muhimu vilikuwa vimepatikana,” alisema.
Tukio hilo limeibua upya wasiwasi kuhusu viwango vya usalama katika eneo la katikati mwa jiji la Nairobi, ambako shughuli za ujenzi na ubomoaji hufanyika katika maeneo yenye msongamano mkubwa wa watu na magari.
Ubomoaji wa majengo unaweza kuhatarisha maisha iwapo tathmini ya uimara wa miundombinu, usimamizi wa kitaalamu na hatua za usalama hazitazingatiwa ipasavyo.
Mamlaka za kaunti zinatarajiwa kubaini iwapo taratibu zinazohitajika zilifuatwa wakati wa ubomoaji wa jengo hilo lililokuwa na Club Avenida.
Uchunguzi unaotarajiwa kufanyika utasaidia kufafanua chanzo cha tukio hilo na kubaini iwapo kuna wahusika watakaopaswa kuwajibika kutokana na kuporomoka kwa jengo hilo na kuwaacha watu wanne na majeraha katika mojawapo ya barabara zenye shughuli nyingi jijini Nairobi.
