Ombi limewasilishwa katika Mahakama Kuu ya Milimani, Nairobi, kutaka Bunge la Kitaifa na Seneti zizuiwe kuwasilisha kwa Rais Mswada wa Marekebisho ya Sheria ya Uchaguzi iwapo utakuwa na vifungu vinavyolenga kuondoa sharti la kutangaza moja kwa moja matokeo ya uchaguzi kutoka vituo vya kupigia kura.
Wakili John Muremi Njomo, aliyewasilisha ombi hilo, anaitaka mahakama kutoa amri za muda za kuzuia Bunge kuwasilisha Mswada wa Marekebisho ya Sheria ya Uchaguzi (Nambari 2) wa mwaka 2024, unaojulikana pia kama Senate Bill No. 29 of 2024, kwa ajili ya kutiwa saini na Rais katika hali itakayoondoa sharti hilo.
Katika ombi lake, Njomo anapinga Kifungu cha 22 cha mswada huo, akisema kuwa hatua yoyote inayolenga kufuta au kuondoa sharti lililowekwa chini ya Kifungu cha 39 cha Sheria ya Uchaguzi inapaswa kuzuiwa.
Kifungu hicho kinaitaka Tume Huru ya Uchaguzi na Mipaka (IEBC) kuanzisha na kudumisha mfumo wa kutangaza moja kwa moja matokeo ya uchaguzi yanayotangazwa katika vituo vya kupigia kura.
Njomo anaitaka mahakama kutangaza ombi hilo kuwa la dharura na kutoa amri za muda kabla ya pande zote zinazohusika kuitwa kusikilizwa.
Pia anataka mahakama kusimamisha utekelezaji wa Kifungu cha 22 pamoja na masharti yoyote yatakayojumuishwa katika sheria itakayotokana na mswada huo, iwapo yataondoa wajibu wa kutangaza matokeo moja kwa moja.
Aidha, wakili huyo anataka mahakama ihifadhi hali ya sasa ya kisheria ili IEBC iendelee na mipango yake, ununuzi wa vifaa na maandalizi mengine ya uchaguzi mkuu unaotarajiwa kufanyika Agosti 10, 2027, pamoja na chaguzi ndogo, kwa kuzingatia kuwa sharti la matangazo ya moja kwa moja ya matokeo bado lipo.
Mwanasheria Mkuu wa Serikali, Bunge la Kitaifa na Seneti wametajwa kuwa washitakiwa katika kesi hiyo, huku IEBC ikiwa mhusika mwenye maslahi katika mzozo huo.
Njomo pia anaitaka mahakama kuthibitisha kuwa kesi hiyo inazua masuala mazito ya kikatiba na kisheria chini ya Kifungu cha 165(4) cha Katiba ya Kenya.
Iwapo ombi hilo litakubaliwa, Jaji Mkuu ataweza kuteua jopo la majaji wasiopungua watatu, wakiwa na idadi isiyolingana, kusikiliza na kuamua kesi hiyo.
Kesi hiyo inatarajiwa kuangazia nafasi ya sheria katika kuhakikisha uwazi wa mchakato wa uchaguzi, huku maandalizi ya uchaguzi mkuu wa mwaka 2027 yakiendelea.
